Zinəddin Zidanın gələcək ünvanı bilindi
“Real Madrid”in sabiq baş məşqçisi Zinəddin Zidan futbola qayıtmaq qərarına gəlib.
Operativ Media xəbər verir ki, bu haqda "Defensa" məlumat yayıb.
Zidana yaxın mənbələrin verdiyi məlumata görə, mütəxəssis artıq Kilyan Mbappe də daxil olmaqla Fransa futbolunun bir neçə nümayəndəsinə növbəti addımının Didye Deşamın komandadan ayrılmasından sonra, 2026-cı il Dünya Kubokundan etibarən Fransa millisinin baş məşqçisi olmaq olacağını bildirib. Məlumata görə, tərəflər müqavilənin şərtləri ilə bağlı artıq razılığa gəliblər.
Zidan bu qərarla “Real Madrid”də mümkün dəyişikliklərlə bağlı müzakirələrdən namizədliyini qəti şəkildə geri götürüb. Fransalı mütəxəssis Fransa millisində qarşıdakı fəaliyyətinə diqqət yetirir və Madrid klubu ilə bağlı məşqçilik müzakirələrinə müdaxilə etmək niyyətində deyil.
“Real Madrid”in qeyri-sabit nəticələri fonunda Zinəddin Zidanın adı son vaxtlar mediada Xabi Alonsonun potensial əvəzedicisi kimi hallandırılsa da, fransız məşqçi “Los Blankos”un sükanı arxasına qayıtmaq planlarının olmadığını açıq şəkildə bəyan edib.
Xatırladaq ki, Zinəddin Zidan “Real Madrid”i iki dəfə — 2016–2018 və 2019–2021-ci illərdə çalışdırıb. Onun rəhbərliyi altında Madrid klubu iki La Liqa çempionluğu və üç Çempionlar Liqası kuboku da daxil olmaqla ümumilikdə 11 titul qazanıb.
