"Barselona" prezidentliyinə namizəd: "Messiyə yenidən ehtiyac var"

"Barselona"nın prezidentliyə namizədi Mark Siria cəsarətli bir açıqlama verərək Lionel Messinin qayıdışını 2026-cı il seçki kampaniyasının əsas məqsədlərindən biri adlandırıb.

Operativ Media "Goal" nəşrinə istinadən xəbər verir ki, seçki platformasını təqdim edən Siria Kataloniya klubunun hələ də Messiyə ehtiyacı olduğunu vurğulayıb. Onun sözlərinə görə, argentinalı oyunçu təkcə "Barselona"nın simvolu deyil, həm də klubun imici, nüfuzu və iqtisadiyyatı baxımından həyati əhəmiyyətli bir aktiv olaraq qalır. Namizəd əfsanənin yenidən "Barselona" ilə əlaqələndirilməsi üçün "mümkün olan hər şeyi etməyə" hazır olduğunu bildirib.

Eyni zamanda Siria Messinin hansı vəzifədə – oyunçu, klub nümayəndəsi və ya başqa bir rolda – qayıda biləcəyini dəqiqləşdirməyib.

38 yaşlı hücumçu hazırda "İnter Mayami"də çıxış edir və bu yaxınlarda müqaviləsini uzadıb. Bu isə onun "Barselona"da tezliklə meydana qayıtmasını faktiki olaraq qeyri-mümkün edir. Həmçinin, Messi özü də dəfələrlə MLS-dən təqaüdə çıxdıqdan sonra "Barselona"ya qayıtmaq istədiyini bildirib.

Klubun vəziyyəti barədə danışan Siria mövcud rəhbərliyi sərt şəkildə tənqid edərək artan borcu və maliyyə bərpasında nəzərəçarpacaq irəliləyişin olmamasını əsas gətirib. O, idarəetmə islahatları və klubun həyatında azarkeşlərin daha çox iştirakı vəd edib.

Qeyd etmək lazımdır ki, Barselonada prezident seçkiləri 2026-cı ildə keçiriləcək.