Kevin Medina: "Tarixi nəticə əldə etdik və pley-offa yüksəldik"

"Qarabağ"ın futbolçusu Kevin Medina Çempionlar Liqasının Liqa mərhələsinin sonuncu 8-ci turunda "Liverpul"a məğlubiyyətdən sonra (0:6) komandanın turnirdəki çıxışını şərh edib.

Operativ Media xəbər verir ki, müdafiəçi "İctimai TV"yə açıqlamasında İngiltərədəki matçın nəticəsini artıq dəyişdirmək mümkün olmadığını, lakin ümumilikdə komandanın bu mərhələni ləyaqətlə başa vurduğunu qeyd edib.

"Təəssüf ki, nəticə artıq müəyyənləşib və bununla bağlı heç nə etmək mümkün deyil. Ümumilikdə, bu mərhələdə çox güclü rəqiblərlə oynadıq. Bütün komandalar pley-off yeri uğrunda mübarizə aparırdı. Allaha şükür ki, yaxşı oyunlarımız oldu. Kifayət qədər xal qazandıq, tarixi nəticə əldə etdik və pley-offa yüksəldik" - Medina bildirib.

O, həmçinin pley-offdakı potensial rəqiblər barədə də fikirlərini bildirib:

"Həm Nyukasl, həm də PSJ çox yüksək səviyyəli komandalardır. Onların dünya futbolunda öz üslubu və tarixi var. Rəqiblərimiz haqqında püşkatmadan sonra daha konkret danışa biləcəyik".

Medina Çempionlar Liqasında iştirakla bağlı təəssüratlarını da bölüşüb:

"Dünyada elə bir futbolçu yoxdur ki, bu möhtəşəm turnirdə oynamağı xəyal etməsin. Biz də Çempionlar Liqasında möhtəşəm komanda olan "Qarabağ"la oynamağı xəyal edirdik. Hər oyundan zövq aldım və hər bir matçda ən yüksək səviyyədə çıxış etməyə çalışdım"