WUF13 çərçivəsində 2026-cı il üçün Dünya Şəhərləri Hesabatı təqdim olunub
Ümumdünya Şəhərsalma Forumunun 13-cü Sessiyası (WUF13) çərçivəsində 2026-cı il üçün Dünya Şəhərləri Hesabatı təqdim olunub.
Operativ Media xəbər verir ki, "Qlobal Mənzil Böhranı: Fəaliyyətə Doğru Yollar" mövzulu hesabatda qlobal urbanizasiya prosesləri, mənzil təminatı, iqlim dəyişikliklərinin şəhərlərə təsiri və dayanıqlı şəhər inkişafı ilə bağlı əsas çağırışlar əksini tapıb.
Hesabat layiqli mənzil təminatını sadəcə sığınacaq verməkdən daha geniş bir anlayış kimi nəzərdən keçirərək, onu dayanıqlı şəhər inkişafının və insan rifahının fundamental sütunu kimi qabardır. Həmçinin sənəddə yoxsulluğun azaldılmasında, həyat keyfiyyətinin yaxşılaşdırılmasında, eləcə də qeyri-rəsmi yaşayış məntəqələrinin və gecəqonduların transformasiyasında təhlükəsiz, hər kəs üçün əlçatan və əlverişli məkanda yerləşən mənzillərin əhəmiyyəti vurğulanıb.
Qeyd edək ki, 9 fəsildən ibarət hesabatda icmalar tərəfindən idarə olunan yenidənqurma təşəbbüslərini dəstəkləyən, inklüziv və iştirakçı yanaşmalara çağırış edilib.
