Elm və Təhsil Nazirliyi tərəfindən müəllimlərin əməkhaqqı ilə bağlı həyata keçirilən xronoloji islahatlar və gələcək hədəflər açıqlanıb.

Operativ Media xəbər verir ki, bu haqda "Sertifikatlaşdırma: səriştəli müəllim - keyfiyyətli təhsil" mövzusunda keçirilən tədbirdə bildirilib.

Məlumata görə, islahatların ilk böyük mərhələsi 2015-ci ildə diaqnostik qiymətləndirmənin tətbiqi ilə başlayıb. 

Həmin dövrdə müəllimlərin həftəlik dərs yükü norması 12 saatdan 18 saata qaldırılıb, aylıq vəzifə maaşları isə orta hesabla 2 dəfə artırılıb.

İkinci mühüm mərhələ 2022-ci ildə sertifikatlaşdırma prosesinin tətbiqi ilə reallaşıb. 

Bu islahat çərçivəsində imtahanlarda uğur qazanan müəllimlərin maaşına 10%, yüksək nəticə göstərənlərin maaşına isə 35% əlavə hesablanıb.

İslahatlar planında növbəti əsas hədəf 2027-ci il olaraq müəyyən edilib. 

Belə ki, gələn il sertifikatlaşdırma prosesinin ölkədəki bütün müəllim heyətini tam əhatə edəcəyi gözlənilir. 

Bunun ardınca isə sistemdə növbəti islahat ehtiyaclarının qarşılanması istiqamətində addımların atılacağı planlaşdırılır.