Şarl Lekler Azərbaycan Qran-prisində start cəzası alacaq

“Ferrari” pilotu Şarl Leklerin mühərrik cəzasını Formula 1 üzrə Azərbaycan Qran-prisində alacağı bildirilib.

Operativ Media xəbər verir ki, bu barədə “ScuderiaFans” məlumat yayıb. Qərarın Leklerin sentyabrın 6-da İtaliya Qran-prisində “Parabolika” döngəsində ikinci dövrədə keçirdiyi qəza ilə əlaqədar olduğu qeyd edilib.

“Ferrari” FIA-nın ADUO sistemi çərçivəsində ikinci güc qurğusu yeniləməsini tətbiq etmişdi. Lakin komanda İspaniya Qran-prisində əvvəlki güc qurğusuna qayıtmalı olub və Lekler yarışı dördüncü pillədə başa vurub.

Yarışdan sonra komandanın rəhbəri Fred Vasser qəzadan sonra ADUO2 güc qurğusunun dəyişdirilməsinin lazım gələcəyini açıqlayıb. O, “Canal+”a açıqlamasında Leklerin mühərrik cəzasının harada alınacağı ilə bağlı “Bakı bunun üçün olduqca uyğun yerdir” deyib.

“ScuderiaFans”ın məlumatına görə, güc qurğusunda aparılan əlavə rentgen müayinələri nəticəsində istilik gərginliyindən yaranan çatlar aşkarlanıb. Buna baxmayaraq, həmin mühərrikin Azərbaycanda keçiriləcək məşq seansında istifadəsi, daha sonra isə şənbə günü dəyişdirilməsi planlaşdırılır.

Mühərrikin dəyişdirilməsi Lekler üçün start cəriməsi ilə nəticələnəcək. Bakının seçilməsinin səbəblərindən biri isə şəhər trekində ötmə imkanlarının çox olmasıdır.

“Ferrari” oxşar vəziyyətdə “Mercedes”in İtaliya Qran-prisində əldə etdiyi nəticəni təkrarlamağa ümid edir. Həmin yarışda Kimi Antonelli güc qurğusunun dəyişdirilməsinə görə startın arxa sıralarından başlayıb və çoxsaylı ötmə imkanlarından istifadə edərək yarışı qazanıb.