"NATO "soyuq müharibə" planlarına qayıdıb".
"Operativ Media" xəbər verir ki, bunu NATO-nun Vilnüs Sammitinin nəticələrini qiymətləndirən Rusiya Xarici İşlər Nazirliyi açıqlayıb.
“Rusiyanın təhlükəsizliyinə və maraqlarına yönələn təhdidləri və çağırışları nəzərə almaq, operativ və lazımi cavab vermək üçün bütün mövcud vasitə və üsullardan istifadə edəcəyik”, - deyə bəyanatda bildirilir.
“NATO bir daha “bir milyard” bəşəriyyətin digər hissəsindən qorumaq üçün Soyuq Müharibə planlarına qayıdıb. Bu dəfəki plan dünyanı “demokratiya və avtokratiyalara” bölmək ideologiyasına əsaslanır. NATO çevik reaksiya qüvvələrini 300 min əsgərə qədər artırıb və inteqrasiya olunmuş hava və ballistik raketdən müdafiə sistemi yaradacaq. Brüssel artıq bu sistemin Rusiyanı hədəf almayacağına dair keçmiş zəmanətlərindən danışmır”, - Rusiya XİN-dən bildirilib.
"Münaqişəni gərginləşdirməkdə qərarlı olan blok Kiyevi daha müasir və daha uzun mənzilli silahlarla təmin edəcək ki, bu addım münaqişəni mümkün qədər uzatmaq niyyətlərindən xəbər verir", - bəyanatda qeyd edilib.
"Blok Gürcüstan, Bosniya və Herseqovina və Moldovanı öz alyansına daxil etmək səylərindən əl çəkməyib. NATO-nun ekspansionist ambisiyaları təkcə Avro-Atlantik regionu ilə məhdudlaşmır. Heç bir ictimai müzakirə və referendum olmadan Finlandiyanı və İsveçi az qala udmuş NATO Arktikaya hərbi münaqişə gətirməyə çalışır. Eyni zamanda, postsovet məkanına fəal şəkildə soxulur. Yaxın Şərq və Afrika strateji maraq zonaları elan edilib. Biz Vilnüs sammitinin nəticələrini diqqətlə araşdıracağıq. Qəbul edilən qərarlarla yanaşı, hərbi strukturumuzu və ölkənin müdafiə sistemini gücləndirməyə davam edəcəyik", - XİN tamamlayıb.
