Azərbaycan klubları Avropa turnirlərinə mübarizəyə başlayıblar. Çempionlar Liqası və Konfrans Liqasında mübarizə aparan klublarımızdan cəmi 1-i qələbə qazana bilib.
"Operativ Media" xəbər verir ki, Çempionlar Liqasının 2-ci təsnifat mərhələsində çıxış edən "Qarabağ" klubu Polşanın son çempionu "Rakuv"un qonağı olub. 3-2 hesabı ilə məğlub olan Azərbaycan təmsilçisi meydana 4 azərbaycanlı və 7 legioner futbolçu ilə çıxıb.
Bu matçda "Qarabağ"ın 3 futbolçusu sarı vərəqə ilə cəzalanıb. Ağdam təmsilçisinin hər iki qolunu albaniyalı Redon Cica vurub. Cavab qarşılaşması avqustun 2-i BOS-da keçiriləcək.
Konfrans Liqasında mübarizə aparan "Sabah" klubu səfərdə Latviyanın RFS klubunun qonağı olub. "Sabah" klubu meydana 6 azərbaycanlı və 5 legioner futbolçu ilə çıxıb. Matç Azərbaycan təmsilçisinin 0-2 hesablı qələbəsi ilə başa çatıb. Qolları David Volkov və Bojan Letic vurub. Bu matçda "Sabah" klubunun 3 futbolçusu hakim tərəfindən sarı vərəqə ilə cəzalanıb. Cavab qarşılaşması avqustun 3-ü "Bank Respublika Arena"da baş tutacaq.
Bu tur Azərbaycanda oynayan yeganə təmsilçimiz "Qəbələ" klubu olub. Qəbələ şəhər stadionunda Kiprin "Omoniya " klubunu qəbul edən "Qəbələ" klubu 2-3 hesabı ilə məğlub olub. Təmsilçimiz meydana 5 azərbaycanlı və 6 legioner futbolçu ilə çıxıb. Azərbaycan təmsilçisinin hər iki qolunu Eyyub Allaş vurub. Oyunun hakimi "Qəbələ" futbolçularından ikisini sarı vərəqə ilə cəzalandırıb. Kiprdə keçiriləcək matç avqustun 3-ü keçiriləcək.
Bu həftənin son matçında "Neftçi" səfərdə Bosniyanın "Jelezniçar" klubunun qonağı olub. Hərəyə 2 qol vuran komandalar sülhə razılaşıblar. Bu matça Bakı klubu 5 yerli və 6 legioner futbolçu ilə çıxıb. "Neftçi"nin qollarını Rəhman Hacıyev və Aleksandr Kosoric (öz qapısına) vurub. Bu matçda "ağ-qaralar"ın cəmi bir futbolçusu sarı vərəqə ilə cəzalanıb. Bu komandalar arasındakı ikinci matc avqustun 3-ü "Bakcell Arena"da baş tutacaq.
Ümumilikdə klublarımız rəqib qapılarına 8 qol vurub və öz qapılarında 8 qol görüb. Bu qollardan cəmi 1-ni azərbaycanlı futbolçu (Rəhman Hacıyev) vurub.