ABŞ Belarus hökumətinə qarşı sanksiyaları genişləndirib
ABŞ-nin “saxta” adlandırdığı 2020-ci il prezident seçkilərinin üçüncü ildönümü ilə əlaqədar Belarusdan 8 nəfər və daha 5 təşkilat sanksiya siyahısına əlavə edilib.
"Operativ Media" xəbər verir ki, bu barədə ABŞ Maliyyə Nazirliyi Xarici Aktivlərə Nəzarət Ofisi (OFAC) məlumat yayıb.
Ofis tərəfindən tətbiq edilən sanksiyaların Belarus hakimiyyətinin 2020-ci ilin avqustunda keçirilən prezident seçkilərini saxtalaşdırmasının və əsas azadlıqlarını tələb edən Belarusdakı etirazçılara qarşı sərt repressiyaların üçüncü ildönümündə uzadıldığını açıqlanıb.
Açıqlamada sanksiya siyahısına 8 nəfərin və 5 təşkilatın əlavə edildiyi, bir təyyarənin isə “bloklanmış aktiv” kimi müəyyən edildiyi qeyd edilib.
Vurğulanıb ki, OFAC-ın bu addımı Belarus administrasiyasının vətəndaş cəmiyyətinə qarşı davam edən təzyiqini, Rusiyanın Ukraynada apardığı ədalətsiz müharibədə iştirakını və Belarus prezidenti Aleksandr Lukaşenkonun varlanmasında iştirak edən bir neçə təşkilatı hədəf alıb.
Bildirilib ki, bu gün OFAC-ın hədəfində olan şəxslər və təşkilatlar sırasına 3 dövlət müəssisəsi (DMM), dövlət müəssisələrindən birinin meneceri və törəmə müəssisəsi, Belarusun 1 dövlət qurumu və qurumun 4 əməkdaşı, sanksiyaların qarşısının alınmasına şərait yaradan 3 nəfər daxildir.
ABŞ Maliyyə Departamentinin Terrorizm və Maliyyə Kəşfiyyatı üzrə Müşaviri Brayan Nelson vurğulayıb ki, onlar tərəfdaşları və müttəfiqləri ilə birlikdə Belarus administrasiyasının öz vətəndaşlarına qarşı pis rəftarına cavab olaraq görülən tədbirləri təmin etməyə davam edəcəklər.
