Rusiya: "Niger böhranının hərbi yolla həlli qarşıdurmaya səbəb ola bilər"

Niger böhranının hərbi yolla həlli ölkədə uzun müddət davam edən münaqişəyə səbəb ola bilər.

"Operativ Media" xəbər verir ki, bu barədə Rusiya Xarici İşlər Nazirliyinin bəyanatında deyilir.

Rusiya Xarici İşlər Nazirliyi, Rusiyanın Niger Respublikasında baş verənləri yaxından izlədiyinə diqqət çəkib.

"Qərbi Afrika Dövlətlərinin İqtisadi Birliyi (ECOWAS) Nigerin yeni hakimiyyət orqanları ilə siyasi və diplomatik dialoq yolu ilə Nigerdə konstitusiya nizamını bərpa etmək üçün addımlar atır. Rusiya ECOWAS-ın mövcud böhrandan çıxış yollarının tapılmasına yönəlmiş vasitəçilik səylərini dəstəkləyir", - bəyanatda deyilir.

Bundan əlavə, Rusiya Xarici İşlər Nazirliyi bildirib ki, ECOWAS-ın avqustun 10-da Abucada keçirilən fövqəladə sammitində, Nigerin devrilmiş prezidenti Məhəmməd Bazumu azad etmək üçün mümkün silahlı müdaxilə məqsədilə icmanın ehtiyat qüvvələrinin yerləşdirilməsi üçün hazırlıqlara başlamaq barədə qərar qəbul edilib. Qeyd edilib ki, Niger ordusu istənilən xarici müdaxiləni dəf etməyə hazır olduqlarına söz verib. Bundan əlavə, onlar vətəndaş cəmiyyətinin üzvlərini birləşdirən keçid hökumətinin yaradılmasını elan ediblər.

"Biz hesab edirik ki, Niger böhranının hərbi yolla həlli çox güman ki, bu Afrika ölkəsində uzun sürən qarşıdurmaya səbəb olacaq və ümumilikdə Sahara Sahel regionunda vəziyyəti kəskin şəkildə pozacaq", - Rusiya Xarici İşlər Nazirliyi vurğulayıb.