Havay adalarında yanğın nəticəsində ölənlərin sayı 89-a çatıb (FOTOLAR)

ABŞ-nin Havay ştatının ən böyük adalarından biri olan Mauidə baş verən meşə yanğınlarında həyatını itirənlərin sayı 89-a çatıb. 

"Operativ Media" dünya mətbuatına istinadən xəbər verir ki, ştat tarixindəki ən ölümcül fəlakətdə yüzlərlə insanın itkin düşdüyü bildirilir. 

Axtarış işləri xüsusi yetişdirilmiş itlər ilə aparılır. Ölənlərin sayının arta biləcəyi vurğulanıb. Alovla mübarizə adanın üç fərqli nöqtəsində davam edir.

Adada təbii fəlakət zamanı insanlara məlumat verməsi nəzərdə tutulan xəbərdarlıq siqnallarının yanğın zamanı işləmədiyi iddia edilib. Havay adalarının qubernatoru Coş Qrin ABŞ mediasına verdiyi açıqlamada, "Mən nə baş verdiyini dəqiqləşdirmək üçün hərtərəfli araşdırmaya başlamağı tapşırmışam", - deyib.

Qeyd edək ki, Maui adasında çərşənbə axşamı başlayan meşə yanğınları Dora qasırğasının təsiri ilə tədricən geniş əraziyə yayılıb, 14 mindən çox turist təxliyə edilib. 

ABŞ prezidenti Co Bayden Havay adalarını fəlakət bölgəsi elan edərək, adaya federal yardım ayırıb.