Yaponiya avqustun 24-dən Fukusima suyunu okeana buraxacaq

Yaponiya avqustun 24-də Çinin sərt tənqidlərə səbəb olan planı həyata keçirərək, qəzaya uğramış Fukusima AES-dən 1 milyon tondan çox təmizlənmiş radioaktiv suyu okeana buraxmağa başlayacaq.

"Operativ Media" "Reuters"ə istinadən xəbər verir ki, bu barədə ölkənin Baş Naziri Fumio Kişida bildirib.

Yaponiya suyun axıdılmasının təhlükəsiz olduğunu bildirib. BMT-nin nüvə nəzarəti orqanı olan Beynəlxalq Atom Enerjisi Agentliyi (MAQATE) iyul ayında plana yaşıl işıq yandıraraq, planın beynəlxalq standartlara cavab verdiyini, insanlara və ətraf mühitə təsirinin "cüzi" olduğunu bildirib.

Lakin, bəzi qonşu ölkələr planın təhlükəsizliyinə şübhə ilə yanaşır, Pekin planın ən böyük tənqidçisi olub. Xarici İşlər Nazirliyinin sözçüsü Wang Wenbin iyul ayında Yaponiyanın eqoizm və təkəbbür nümayiş etdirdiyini və suyun axıdılması ilə bağlı beynəlxalq ictimaiyyətlə tam məsləhətləşmədiyini söyləyib.

Qeyd edilib ki, Çin Fukusima və paytaxt Tokio da daxil olmaqla Yaponiyanın 10 prefekturasından dəniz məhsulları idxalına qadağa qoyub. Digər əyalətlərdən dəniz məhsulları idxalına icazə verilir, lakin onlar radioaktivlik testlərindən keçməli və qadağan olunmuş 10 əyalətdən kənarda istehsal olunduğunu sübut etməlidirlər.