Qazaxıstanda rəqəmsallaşma sahəsində aparılan islahatlar çərçivəsində vergi inzibatçılığının yeni informasiya sistemlərinin işlənməsi ilə bağlı Azərbaycan təcrübəsinin öyrənilməsi məqsədilə Qazaxıstan Maliyyə Nazirliyinin Dövlət Gəlirləri Komitəsinin nümayəndə heyəti ölkəyə səfər edib.
"Operativ Media" xəbər verir ki, bu barədə İqtisadiyyat Nazirliyi yanında Dövlət Vergi Xidməti məlumat yayıb.
Dövlət Gəlirləri Komitəsinin sədr müavini Anuar Süleymenovun rəhbərlik etdiyi nümayəndə heyəti fevralın 14-15-də Dövlət Vergi Xidmətində bir sıra görüşlər keçirərək təcrübə mübadiləsi aparıblar.
Dövlət Vergi Xidmətinin nümayəndələri qonaqlara Azərbaycanda uğurla tətbiq olunan “ƏDV geri al” layihəsi, nağdsız qaydada alınmış yaşayış və qeyri-yaşayış sahələrinə görə ödənilmiş ƏDV-nin bir hissəsinin qaytarılması inzibatçılığı, onlayn kassaların tətbiqi, ƏDV üzrə vahid depozit hesabı, həmçinin beynəlxalq vergitutma sahəsində əldə olunmuş nailiyyətlər barədə ətraflı məlumat veriblər. Görüşlərdə “onlayn kargüzarlıq” sistemi vasitəsilə vergi ödəyiciləri ilə vergi orqanları arasında elektron sənəd mübadiləsi, Avtomatlaşdırılmış Vergi İnformasiya Sisteminin (AVİS) altmodullarının (Bəyannamə, Kargüzarlıq, Şəxsi Hesab Vərəqəsi, Borclar, VÖEN) strukturu da maraq doğurub. Bundan başqa, qonaqlara idxal-ixrac əməliyyatları üzrə Dövlət Vergi Xidmətinin riskli vergi ödəyicisinin müəyyənləşdirilməsi və riskli əməliyyatların meyarları, o cümlədən bu sahədə tətbiq olunan rəqəmsal həllər və bununla bağlı gələcək planlar haqqında məlumatlar təqdim olunub.
Görüşlər zamanı Azərbaycanın vergi sistemində əldə edilən nailiyyətlərlə yanaşı, Qazaxıstanda yekunlaşmaqda olan “ümumi bəyannamə sistemi” layihəsi, həmçinin bu ölkənin “markalanmalı və məcburi nişanlanmalı mallar” üzrə vergi inzibatçılığı sahəsində təcrübəsi də öyrənilib. Yaxın günlərdə beynəlxalq vergitutma və idxal-ixrac mövzularında Qazaxıstan Maliyyə Nazirliyinin Dövlət Gəlirləri Komitəsinin təcrübəsi ilə bağlı onlayn görüşlərin keçirilməsi barədə razılıq əldə olunub.
