Azərbaycan və Türkiyə arasında ikiqat vergitutmanın aradan qaldırılması nələri dəyişəcək?

Dünən “Azərbaycan Respublikası və Türkiyə Respublikası arasında gəlirlərə görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında Saziş” imzalandı.

İki ölkənin iqtisadi əlaqələri üçün çox önəmli olan bu saziş özündə nəyi ehtiva edir?

“Operativ Media” xəbər verir ki, hazırda Azərbaycan Respublikası ikiqat vergitutmanın aradan qaldırılması haqqında 50-dən çox dövlətlə saziş imzalayıb. Eskpertlər bildirir ki, ikiqat vergitutmanın aradan qaldırılması haqqında sazişlər xarici investisiyaların cəlb edilməsini stimullaşdırır. İkiqat vergitutma bir şəxsin eyni gəlirinin birdən artıq dövlət tərəfindən eyni növlü vergiyə cəlb edilməsidir. Bu, dövlətlərarası mal və xidmət ticarətinə, kapitalın, texnologiyanın və şəxslərin sərbəst hərəkətinə mənfi təsir etməklə, dövlətlərarası iqtisadi əlaqələrin inkişafına maneə törədir.

İkiqat vergitutmanın aradan qaldırılmadığı ölkələrdə sahibkar əgər investisiya yatırdığı ölkədən gəlir çıxarırsa, həmin ölkəyə vergi ödəyir. Bir qayda olaraq öz ölkəsində də təkrarən eyni gəlirdən vergi ödəməli olur. Məhz buna görə, investorlar ikiqat vergitutmanın aradan qaldırıldığı ölkələrə sərmaye yatırmağa üstünlük verir. 

İkiqat vergitutmanın aradan qaldırılması ilə isə bir şəxs digər dövlətdən gəlir əldə etiyi zaman onun ödədiyi vergi iki dövlət arasında bölünür. Nəticədə investor iki dəfə vergiyə cəlb olunmur.

Bu sazişin Türkiyədən gətirilən ən çox gətirilən tekstil, məişət əşyaları, tərəvəzlər, qida və dərman vasitələri kimi məhsulların qiymətinə təsir edəcəyi gözlənilir.

Qeyd edək ki, bu saziş Türkiyədə Azərbaycan kapitalı ilə qeydiyyata alın 2800 şirkətə də şamil olunacaq. Son rəsmi məlumata görə isə Azərbaycanda 5700-dən çox Türkiyə şirkəti qeydiyyatdan keçib. Azərbaycan Türkiyənin podratçı şirkətlərinin dünyada ən çox layihə icra etdiyi 130 ölkə arasında 9-cu sıradadır. Bu rəqəm 20 milyard dollardan çoxdur.