Dövlət işğaldan azad edilmiş ərazilərdə fəaliyyət göstərən sahibkarlara hansı dəstəyi göstərir?

İqtisadiyyat Nazirliyinin Sahibkarlığın İnkişafı Fondu (SİF) işğaldan azad olunmuş ərazilərdə iqtisadi aktivliyin bərpa olunması və bu ərazilərdə investisiya qoyuluşlarının sürətlənməsinə dəstək məqsədilə "İşğaldan azad edilmiş ərazilərdə sahibkarlara dəstək" mexanizmini təqdim edir.

"Operativ Media" xəbər verir ki, artıq bu ərazilərdə investisiya layihəsi həyata keçirən sahibkarın bank və bank olmayan kredit təşkilatlarından (BOKT) əldə etdikləri kreditlərin 90 faizədək hissəsinə dövlət zəmanəti verilir. Sahibkarlar həm də həmin kreditlər üçün subsidiyadan yaralana bilərlər.

Sahibkarlığın İnkişafı Fondunun mexanizminin şərtlərinə əsasən hər bir sahibkarlıq subyekti üzrə məbləği 5 milyon manatadək, müddəti 7 ilədək, illik faiz dərəcəsi 15 faizdən çox olmayan kreditlər üzrə sahibkarlar bu mexanizimdən yararlana bilər.

Zəmanət verilən kreditlərin  illik faiz dərəcəsinin 10 faiz bəndi 36 aydan çox olmayan müddətdə dövlət tərəfindən subsidiyalaşdırılır. Həmin kreditlər üzrə kreditin müddətinin yarısından çox olmamaqla 36 ayadək güzəşt müddəti tətbiq edilir. 

Mexanizmə müraciət e-gov.az portalı və edf.gov.az saytının üzərindən "Elektron kredit və zəmanət" informasiya sistemi vasitəsilə qəbul edirlir.