Nicat İmanov: DVX sahibkarların böyüdükcə vergi yükünün azaldılmasına xidmət edən tədbirlər həyata keçirəcək

“Bu platforma imkan verir ki, dövlət orqanları ilə sahibkarlar arasındakı münasibətlər daha əlçatan, daha aydın və şəffaf olsun. DVX-nin əsas məqsədi dövlət büdcəsinin xərclərini qarşılamağa imkan verən vergi siyasəti tədbirlərini həyata keçirməkdir. Eyni zamanda, biznes fəaliyyətini stimullaşdırmaqdır. Dayanıqlı vergi mühiti dayanıqlı iqtisadiyyatın və inkişaf edən cəmiyyətin formalaşmasına xidmət edir”.

“Operativ Media” xəbər verir ki, bu sözləri İqtisadiyyat Nazirliyi yanında Dövlət Vergi Xidmətinin Vergi siyasəti Baş İdarəsinin rəisi Nicat İmanov Bakıda keçirilən Vergi Mühasibatlıq Zirvəsində çıxışı zamanı bildirib.

N.İmanov qeyd edib ki, sahibkar düşünməlidir ki, o böyüdükcə onun vergi yükü azalır.

“Buna imkan verən növbəti tədbirləri həyata keçirməyi planlayırıq. Biz gələcəkdə də vergi qanunvericiliyinə əməl edən sahibkarları dəstəkləməyə və vergidən qanunsuz yayınmaya qarşı mübarizəyə davam etməyi hədəfləyirik. Bizim əsas hədəflərimizdən biri də vergilərin könüllü yığılmasını təmin etməkdir. Vergilərin könüllü şəkildə yığılmasına gedən yol isə şəffaflıqdan keçir”.

Nərmin Qocamanlı