Marketlərdəki qiymət problemini necə həll etmək olar?

Alıcılar marketlərdən alış-veriş etdikləri zaman məhsulun piştaxtadakı qiymətinə görüb onu almağa qərar verirlər. Lakin kassada ödəmə zamanı həmin məhsulun fərqli və adətən onların görüb razılşadıqları qiymətdən daha yüksək olduğunu gördükdə xoşagəlməz hallar baş verir. Bu zaman alıcı piştaxta qiymətinin, yoxsa kassa qiymətinin əsas olduğu barədə qərarsız qalır.

Mövzu ilə əlaqədar hüquqşünas Əkrəm Həsənov "Operativ Media"ya bildirib ki, qanuna görə, bu halda piştaxtada yazılan qiymət rəhbər tutulmalıdır.

O, bunu mağazadan nəsə alarkən şifahi formada bağlanmış alqı-satqı müqaviləsi ilə əlaqələndirib:

“Müqavilə həmişə yazılı olmur, şifahi formada da müqavilə bağlanılır. Hər bir müqavilənin bağlanması da Mülki Məcəllənin tələblərinə görə, bir tərəfin təklifi, o biri tərəfin də onu qəbul etməsi etməsi nəticəsində bağlanılır. Mağaza hər hansı malın qiymətini üstünə qoyanda təklif vermiş olur və alıcı o malı götürüb kassaya yaxınlaşanda bununla bəyan edir ki, təklifi qəbul edib. Kassada qiymətin dəyişməsi artıq təklifin dəyişməsidir ki, bu da düzgün deyil, çünki alıcı malı götürüb kassaya yaxınlaşanda müqaviləni bağlamış hesab olunur".

Hüquqşünas bildirib ki, piştaxtadakı qiymət kassada dəyişilirsə, vətəndaş bununla razılaşmaya və məhkəmə qaydasında mübahisələndirə bilər:

“Doğrudur, təcrübədə vətəndaşlar bunu etmirlər, iki seçimdən birini edirlər; ya məhsulu yerinə qoyub almırlar, ya da qiymətin artmasına baxmayaraq, onu yeni qiymətilə alırlar. Amma vətəndaşın bu faktı videoqeydə alıb daha sonra məhkəmə qaydasında mübahisələndirə bilmək haqqı var. Bununla bağlı o, Baş İqtisadiyyat Nazirliyi yanında Antiinhisar və İstehlakçıların Hüquqlarının Müdafiəsi Dövlət Xidmətinə də şikayət edə bilər. Çünki faktiki olaraq həmin mağaza vətəndaşın istehlakçı hüquqlarını pozmuş və onu faktiki aldatmış hesab olunur”.

Sevinc İbrahimzadə