Paytaxt ərazisində “Təmiz hava” aylığı ilə əlaqədar tədbirlər davam etdirilir

Avtomobillərdən atmosferə atılan zərərli tullantıların ətraf mühitə və insan sağlamlığına vurduğu zərərin qarşısının alınması istiqamətində davamlı olaraq qabaqlayıcı tədbirlər həyata keçirilir.

"Operativ Media" xəbər verir ki, bu barədə DİN-in Mətbuat Xidməti məlumat yayıb.

Bakı Şəhər DYP İdarəsinin və Ekologiya və Təbii Sərvətlər Nazirliyinin əməkdaşları ilə birgə «Təmiz hava» aylığı ilə əlaqədar tədbir keçirilmiş, avtonəqliyyat vasitələrinin texniki sazlığının daim diqqət mərkəzində saxlanılmasının əhəmiyyəti barədə sürücü və sahibkarlarla mütəxəssislərin iştirakı ilə maarifləndirici söhbətlər aparılıb.

Lakin həyata keçirilən təbliğat-təşviqat işinin intensivliyinə baxmayaraq, hələ də  avtomobil yollarında mühərriki nasaz olan nəqliyyat vasitələrinə rast gəlinir.

Bir daha sürücülərdən, eləcə də sərnişin və yük daşıma fəaliyyəti göstərən fiziki və hüquqi şəxslərdən istifadələrində olan avtonəqliyyat vasitələrini texniki cəhətdən saz vəziyyətdə istismar etmələrini xahiş edir,  əks təqdirdə aşkar olunan qayda pozuntuları ilə bağlı qanunvericiliyə uyğun tədbirlərin görüləcəyini onların nəzərinə çatdırırıq.