XRİTDX-də 2024-cü ilin birinci yarısının yekunlarına həsr olunmuş müşavirə keçirilib

Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidmətində 2024-cü ilin ilk altı ayının yekunlarına həsr olunmuş müşavirə keçirilib.

XRİTDX-dən "Operativ Media"ya verilən məlumata görə, iclası giriş sözü ilə açan Xidmət rəisi general-leytenant İlqar Musayev dünyada gedən mürəkkəb ictimai-siyasi proseslər və çətin geosiyasi vəziyyətə baxmayaraq, Azərbaycan Respublikası Prezidentinin uzaqgörən siyasəti nəticəsində respublikamızın iqtisadiyyatında əldə edilmiş uğurlar və nailiyyətlərin olduğunu vurğulanıb.

Müşavirədə Xüsusi Rabitə və İnformasiya Təhlükəsizliyi Dövlət Xidməti tərəfindən dövlət orqanlarının xüsusi dövlət rabitəsi, hökumət rabitəsi, xüsusi təyinatlı informasiya-telekommunikasiya sistemləri və şəbəkələri ilə təmin edilməsi, onların internet şəbəkəsi ilə əlaqəsi və internet informasiya resurslarının məlumat və resurs mərkəzində yerləşdirilməsi, istismarı, informasiya təhlükəsizliyinin təmin olunması və onun tələblərin gücləndirilməsi, o cümlədən görülən işlər, mövcud nöqsanlar və qarşıda duran vəzifələr haqqında ətraflı danışılıb.

Respublika ərazisində, o cümlədən işğaldan azad edilmiş ərazilərdə fiber-optik kabellərin çəkilməsi, burada fəaliyyət göstərən dövlət qurumların Azstatenet şəbəkəsinə qoşulması və digər görülmüş işlər barədə hesabat verilib.

Xidmət rəisi Azərbaycan Respublikasında 2024-ci ili «Yaşıl dünya naminə həmrəylik ili» elan edilməsi ilə əlaqədar məlumat vermiş və bu sahədə qarşıda duran vəzifələrdən ətraflı danışıb.

Müşavirədə cari ilin sentyabr ayında Xidmət tərəfindən Azərbaycanda ilk dəfə keçiriləcək Kiberdiplomatiya Konfransının təşkili ilə bağlı qarşıda duran işlər barədə ətraflı danışılıb.

Tədbirin sonunda 26 iyun – Azərbaycan Respublikasının Silahlı Qüvvələri günü münasibətilə Xüsusi Rabitə və İnformasiya Təhlükəsizliyi Dövlət Xidmətinin təltif olunmuş bir sıra əməkdaşlarına mükafatlar təqdim olunub.