Yollarda hərəkət edən hər bir sürücü təkcə özünün deyil, həm də digər hərəkət iştirakçılarının təhlükəsizliyini təmin etməlidir. Təəssüf ki, bəzi sürücülər bu məsuliyyəti nəzərə almadan texniki cəhətdən nasaz avtomobillərlə yola çıxır və bununla da həm özlərini, həm də başqalarını riskə atırlar. Texniki cəhətdən nasaz avtomobilin idarə edilməsi hansı təhlükələrə səbəb ola bilər?
Operativ Media xəbər verir ki, DYP-nin şöbə rəisi Rövşən Tağıyev məsələyə aydınlıq gətirib
• Qəfil dayanma və tıxac yaratma – Mühərrik nasazlığı, təkər partlaması və ya əyləc sistemində problem səbəbindən avtomobil qəfil hərəkətsiz qala bilər. Bu isə arxadan gələn nəqliyyat vasitələri üçün qəza təhlükəsi yaradır.
• İdarəetməni itirmə riski – Sükan, əyləc və ya təkərlərlə bağlı problemlər avtomobilin idarəolunmaz vəziyyətə düşməsinə səbəb ola bilər.
• Digər sürücülərin diqqətini yayındırma – Yolun ortasında xarab olmuş avtomobil qəfil manevrlərə və qəzalara səbəb ola bilər.
Nasaz avtomobillərlə yola çıxan və digər hərəkət iştirakçılarını təhlükəyə atan sürücülər məsuliyyətsiz hərəkət etdiklərini anlamalıdırlar.
Bəs bu zaman kim məsuliyyət daşıyır?
Yolda hərəkət edən hər bir avtomobilin sahibi onun saz və təhlükəsiz vəziyyətdə olmasına görə məsuliyyət daşıyır. Əgər bir sürücü avtomobilinin nasaz olduğunu bilə-bilə yola çıxırsa və qəza şəraiti yaradırsa, o, qanun qarşısında cavabdehlik daşıyır.
Unutmaq olmaz ki, nasaz avtomobillə yola çıxmaq təkcə sürücünün özünü deyil, yüzlərlə insanın həyatını təhlükəyə atır. Hər kəs bu məsuliyyəti dərk etməli və yollarımızı daha təhlükəsiz etməyə çalışmalıdır.
