Diplomatik korpus nümayəndələri işğaldan azad olunmuş ərazilərə səfər çərçivəsində Qarabağ Universitetində olublar.
Operativ Media xəbər verir ki, bu barədə Azərbaycan Prezidentinin köməkçisi Hikmət Hacıyev öz "X" hesabında paylaşım edib.
"Xankəndinin azad edilməsi ilə Azərbaycan öz ərazi bütövlüyünü və suverenliyini tam bərpa edib. Adı “xanın kəndi” mənasını verən bu şəhər Azərbaycanın qədim yaşayış məskənlərindən biridir. 1923-cü ildə "Dağlıq Qarabağ Muxtar Vilayəti"nin yaradılmasından sonra şəhər qanlı bolşevik Stepan Şaumyanın adı ilə adlandırılaraq Stepanakert adını aldı.
Təəssüf ki, 1980-ci illərin sonlarından etibarən Xankəndi terrorizm, irredentizm və separatizm aktlarının hazırlanıb həyata keçirildiyi bir mərkəzə çevrildi. Stepanakert adı altında şəhər faktiki olaraq bir konsentrasiya düşərgəsi kimi fəaliyyət göstərirdi. Burada azərbaycanlı mülki şəxslər və hərbçilər əsir və girov götürülərək ağır işgəncələrə məruz qalır, qətlə yetirilirdi.
Soyuq Müharibənin başa çatması ərəfəsində bu şəhər, təəssüf ki, Helsinki Yekun Aktı, Yeni Avropa üçün Xartiya və BMT Nizamnaməsi üçün bir məzarlığa çevrildi. ATƏT məkanında münaqişə və müharibələrin yeni, aqressiv bir modeli məhz burada ortaya çıxdı.
Bununla belə, Azərbaycan 30 il ərzində strateji səbir nümayiş etdirərək beynəlxalq münasibətlər tarixində bənzərsiz bir yol keçdi və münaqişənin hərbi-siyasi yolla həllinə nail oldu. Bundan əlavə ölkə post-münaqişə dövründə mühüm bir mərhələ olan keçid ədalətini təmin edir. Azərbaycan xalqına qarşı hərbi cinayətlər törədən şəxslər artıq ədalət qarşısında cavab verirlər.
Azərbaycan Cənubi Qafqazda yeni bir status-kvo formalaşdırıb – bu status-kvo ədalət, legitimlik və beynəlxalq hüquq prinsiplərinə əsaslanır. Bu gün Qarabağ və Şərqi Zəngəzur dərin bir transformasiya və yenidənqurma mərhələsi yaşayır.
P.S. Bu gün burada, Qarabağ Universitetində tələbələrin arasında olmaq xüsusi bir qürur mənbəyidir".
