Tramp İstanbulda Rusiya və Ukrayna nümayəndələri ilə görüşməyi planlaşdırır

ABŞ prezidenti Donald Tramp, Rusiya və Ukrayna nümayəndələri arasında görüşlərin keçirilməsi məqsədilə İstanbula səfər etməyi düşündüyünü açıqlayıb.

Operativ Media-nın məlumatına əsasən, Tramp bildirib ki, bu məsələdəki qərarı vəziyyətin inkişafından və tərəflərin razılaşmasından asılı olacaq.

Tramp əlavə edib ki, Ərdoğanla da, Suriya məsələsi ilə bağlı danışıqlar aparır.

"O an harada olacağımı bilmirəm. Yaxın Şərqdə bir yerdə olacağam, amma faydalı olacağını düşünsəm İstanbula uça bilərəm. Çoxlu görüşlərim var, amma həqiqətən, ora getməyi fikirləşirəm. Prezident Ərdoğan əla ev sahibliyi edəcək. Məncə, Putin və Zelenski də orada olacaq. 

Prezident Ərdoğanla Suriya ilə bağlı bəzi məsələlər üzərində də işləyirik və bu arada sanksiyalarla bağlı qərar verməli olacağıq. Suriyaya qarşı sanksiyaları ləğv edə bilərik", - deyə Tramp açıqlamalarında bildirib. 

Qeyd edək ki, bundan əvvəl Zelenski də 15 mayda Türkiyəyə səfər edəcəyini açıqlayıb.