Belçikada keçirilən beynəlxalq araşdırma çərçivəsində NATO-nun döyüş sursatları və pilotsuz uçan aparatların alınması ilə əlaqədar korrupsiya və pul yuyulması ilə məşğul olan iki şübhəli şəxs saxlanılıb.

Operativ Media xəbər verir ki, Belçika Federal Prokurorluğu bu barədə açıqlama verib.

Məlumata görə, Belçika polisi korrupsiya, pul yuyulması və NATO-nun hərbi müqavilələrini bölüşdürən cinayətkar şəbəkənin yaradılması ilə bağlı iki şəxsi saxlayıb və dindirib.

Saxlanılanlardan biri dindirildikdən sonra sərbəst buraxılıb, digərinin isə həbsdə olduğu bildirilib.

Bildirilir ki, bu saxlanılmalar Eurojust-un dəstəyi ilə aparılan beynəlxalq araşdırmanın bir hissəsidir. Araşdırma Belçika, Lüksemburq, Niderland və İspaniyada həyata keçirilib.

Şübhəlilər, NATO-nun Təchizat və Təminat Agentliyi (NSPA) tərəfindən həyata keçirilən hərbi tenderlərə dair məxfi məlumatları müttəfiq ölkələrin hərbi podratçılarına ötürüblər.  

Belçika prokurorluğu, məsələyə bir neçə NSPA əməkdaşının da qarışmış ola biləcəyini və NATO-nun strukturlarının istintaqla tam əməkdaşlıq etdiyini vurğulayıb.