ABŞ İranın ballistik raket proqramını dəstəkləyən Çin şirkətlərinə sanksiya tətbiq edib

ABŞ Dövlət Departamenti Çin və Honq-Konqda yerləşən bəzi şəxsləri və şirkətləri İranın ballistik raket proqramını dəstəklədikləri üçün sanksiya siyahısına əlavə edib.

Operativ Media xəbər verir ki, ABŞ Dövlət Departamentindən verilən yazılı açıqlamada İrana qarşı maksimum təzyiq siyasətinin davam etdiyi vurğulanıb.

Açıqlamada Çin və Honq-Konqda yerləşən bəzi şəxslər və şirkətlərin İranın ballistik raket proqramını dəstəklədikləri səbəbilə sanksiya siyahısına salındığı bildirilib.

Açıqlamada qeyd edilib ki, sözügedən şirkət və şəxslər İranın ballistik raket proqramında istifadə etmək üçün karbon lifi istehsalının lokallaşdırılması səylərini dəstəkləyib, həmçinin İran İnqilabı Keşikçiləri Korpusuna karbon lifi və karbon lifi istehsalı üçün avadanlıq verib.