“Crocus” terror aktını törətməkdə şübhəli bilinən şəxslərin həbs müddəti uzadılıb

Moskva Şəhər Məhkəməsi Crocus City Hall konsert zalında terror aktını törətməkdə şübhəli bilinən şəxslərin həbs müddətini uzadıb.

Operativ Media xəbər verir ki, bu barədə məhkəmənin mətbuat xidmətindən RİA Novosti-yə bildirilib.

“Moskva Şəhər Məhkəməsinin qərarı ilə istintaqın vəsatəti təmin edilib və Fəriduni Şəmsidin, Raçabalizoda Saidakram Murodali, Mirzoyev Dalerdjon Barotoviç və Faizov Muhammadsobir Zokirchonoviçin həbs müddəti 3 ay 28 gün müddətinə uzadılıb”, - deyə məlumatda qeyd olunub.

Xatırladaq ki, terror aktı 2024-cü il martın 22-də axşam saatlarında Moskva vilayətinin Krasnoqorsk şəhərində yerləşən "Crocus City Hall" konsert zalında baş verib. "Piknik" qrupunun çıxışından əvvəl zala silahlı şəxslər daxil olaraq tamaşaçılara atəş açıblar. Bundan sonra partlayışlar olub və yanğın başlayıb. Rusiya İstintaq Komitəsi "terror aktı" maddəsi üzrə cinayət işi açıb. Hadisə ilə bağlı 10-dan çox şəxs saxlanılıb.