Braziliya millisinin sabiq müdafiəçisi Lusio xəstəxanaya yerləşdirilib

"İnter"in və "Bavariya"nın keçmiş müdafiəçisi Lusio həftə sonu bədənində yanıq xəsarətləri ilə xəstəxanaya aparılıb.

Operativ Media xəbər verir ki, 47 yaşlı braziliyalı mayın 14-də Braziliyada xəstəxanaya yerləşdirilib.

Onun həyat yoldaşı Marilia Forgiani Braziliyanın "O Globo" qəzetinə bildirib ki, yanıqlar bioetanolla işləyən ekoloji kamindən çıxan partlayış nəticəsində baş verib.

Lusio Avropada “Bayer” (2001-2004), “Bavariya” (2004-2009) və “İnter”də (2009-2012) çıxış edib. O, həmçinin Braziliya millisinin heyətində 105 oyun keçirib və 2002-ci il dünya çempionatının qalibi olub.