Azərbaycan üç ölkə ilə birlikdə "yaşıl" layihələr üzrə təcrübə mübadiləsi aparacaq

Qazaxıstan, Rusiya, Azərbaycan və Özbəkistan "yaşıl" layihələr üzrə təcrübə mübadiləsi aparacaq.

Operativ Media xəbər verir ki, Qazaxıstanın "QazMunayQaz", Rusiyanın "Tatneft", Azərbaycanın SOCAR və Özbəkistanın "Özbəkneftqaz" şirkətləri dekarbonizasiya atmosferə zərərli qazların atılmasının azaldılması sahəsində əməkdaşlıq sazişi imzalayıblar.

Məlumata görə, tərəflər "yaşıl" enerji layihələri üzrə təcrübə mübadiləsi aparacaq, ətraf mühitin qorunması və tullantıların azaldılması istiqamətində birgə işlər görəcəklər.

"QazMunayQaz" şirkəti bildirib ki, 2031-ci ilə qədər karbon qazı tullantılarını 15%, 2060-cı ilə qədər isə 64% azaltmağı planlaşdırır.

Qazaxıstanın 2060-cı ilə qədər karbon neytrallığına çatmaq üçün təxminən 600 milyard ABŞ dollarına ehtiyacı olduğu qeyd olunur.