Ukrayna üzrə danışıqlarda Rusiya nümayəndə heyətinin tərkibi dəyişməyib

İyunun 2-də Ukrayna üzrə danışıqlarda Rusiya nümayəndə heyətinin tərkibi mayın 16-da olduğu kimi qalacaq,

Operativ Media xəbər verir ki, bunu Rusiya Xarici İşlər Nazirliyinin sözçüsü Mariya Zaxarova bildirib.

Mayın 16-da danışıqlarda Rusiya nümayəndə heyətinə prezidentin köməkçisi Vladimir Medinski başçılıq edib. Onların arasında xarici işlər nazirinin müavini Mixail Qaluzin, Rusiya Silahlı Qüvvələri Baş Qərargahının Baş Kəşfiyyat İdarəsinin rəisi İqor Kostyukov və müdafiə nazirinin müavini Aleksandr Fomin də var.

Xarici işlər naziri Sergey Lavrov dünən Rusiya və Ukrayna arasında danışıqların yeni mərhələsinin bazar ertəsi, iyunun 2-də İstanbulda keçiriləcəyini açıqlamışdı.

Moskva və Kiyev nümayəndələri arasında üç ildə ilk görüş mayın 16-da İstanbulda baş tutub. Tərəflər genişmiqyaslı - "1000-ə 1000" məhbus mübadiləsi keçirmək və gələcək barışıq imkanlarına dair baxışları təqdim etmək barədə razılığa gəliblər.

Danışıqlar zamanı Ukrayna dövlət başçılarının görüşünü istəyib. Rusiya bunu nəzərə alıb.

Genişmiqyaslı məhbus mübadiləsi artıq başa çatıb. Hazırda Moskva gələcək sülh müqaviləsinə dair memorandum layihəsini yekunlaşdırır.