Respublika Fənn Olimpiadaları qaliblərinin mükafatlandırılma mərasiminin tarixi dəyişdirilib

2024–2025-ci tədris ili üzrə keçirilmiş Respublika Fənn Olimpiadalarının qalibləri üçün rəsmi mükafatlandırma mərasimi təşkil olunacaq.

Elm və Təhsil Nazirliyindən Operativ Media-ya verilən məlumata görə, tədbir 23 iyun 2025-ci il tarixində Bakı Konqres Mərkəzində baş tutacaq.

Məlumata görə, bu ənənəvi tədbir ölkənin istedadlı məktəblilərinin elmi nailiyyətlərini cəmiyyətə təqdim etməyi, onları gələcək uğurlar üçün ruhlandırmağı hədəfləyir:

"Respublika Fənn Olimpiadaları 8–11-ci sinif şagirdləri arasında müxtəlif fənlər üzrə yüksək intellektual yarış platformasıdır. Cari tədris ilində keçirilmiş seçim mərhələlərindən uğurla keçmiş və finalda fərqlənmiş 514 nəfər qalib şagird aşağıdakı nəticələrlə təltif olunub:

 I yer – 95 nəfər
II yer – 170 nəfər
III yer – 249 nəfər

Tədbirə dəvət olunacaq şagirdlər və onların müşayiətçiləri barədə müvafiq təlimatlar artıq ümumtəhsil müəssisələrinə göndərilib. Qaliblər tədbirdə iştirak etmək üçün yaşadıqları şəhər və rayon üzrə təhsil aldıqları məktəblərə müraciət etməlidirlər".