İranın İsrailə qarşı cavab tədbirləri başa çatıb.

Operativ Media xəbər verir ki, bu barədə İsrail KİV məlumat verib.

Qeyd edək ki, İran İsrailin addımlarına cavab olaraq sözügedən ölkəyə yüzlərlə ballistik raket zərbələri endirib.

Raketlərin çoxu İsrail Hava Hücumundan Müdafiə Qüvvələri tərəfindən zərərsizləşdirilsə də, Təl-Əvivdə bir neçə binaya və obyektlərə ziyan dəyib.

22:10

İran ordusu ballistik raketlərlə İsrailə hücuma başlayıb.

Operativ Media xəbər verir ki, bu barədə İran mediası məlumat yayıb.

Qarşı tərəfə 100-dən çox raketin atıldığı bildirilib.

Xatırladaq ki, İsrail Hərbi Hava Qüvvələri iyunun 13-də səhər saatlarında İrana zərbələr endirib. Hücum zamanı ölkənin Fordo və Natantz nüvə obyektləri, eləcə də hərbi bazaları hədəfə alınıb. İranın Atom Enerjisi Təşkilatı Natanz nüvə müəssisəsinin məhv edildiyini təsdiqləyib.

Hava əməliyyatları nəticəsində İran İslam İnqilabı Keşikçiləri Korpusunun baş komandanı general-mayor Hüseyn Salami, Silahlı Qüvvələrin Baş Qərargah rəisi general-leytenant Məhəmməd Hüseyn Baqiri, Ali Rəhbərin müşaviri Əli Şamxani, “Hatəm-əl-Ənbiya” Qərargahının rəisi Qulam Əli Rəşid, İran İslam İnqilabı Keşikçiləri Korpusunun Aerokosmik Qüvvələrinin komandanı Əmirəli Hacızadə daxil olmaqla iyirmi yüksək rütbəli zabit və altı nüvə fizikası mütəxəssisi həlak olub. Ümumilikdə isə, onlarla şəxsin həlak olduğu, yüzlərlə şəxsin isə yaralandığı bildirilir.

İran Prezidenti Məsud Pezeşkian və Ali Rəhbər Əli Xamanei İranın İsrailə cavab zərbəsi endirəcəyini bəyan edib.