Türkmənistan İrandan gələn müxtəlif ölkələrin 2 mindən çox vətəndaşını qəbul edib

Türkmənistanın nəzarət-buraxılış məntəqələri Yaxın Şərqdəki münaqişə ilə əlaqədar İrandan gələn müxtəlif ölkələrin 2 mindən çox vətəndaşını qəbul edib.

Operativ Media xəbər verir ki, bu barədə Türkmənistan Xarici İşlər Nazirliyi məlumat yayıb.

Agentlik qeyd edir ki, bunlar Mərkəzi Asiya ölkələri, Rusiya, BƏƏ, Səudiyyə Ərəbistanı, Oman, Bəhreyn, Qətər, Küveyt, Almaniya, İsveçrə, Danimarka, Böyük Britaniya və digər ölkələrin vətəndaşlarıdır.

Ümumilikdə, hazırda 50-yə yaxın ölkə İranı tərk edən vətəndaşlarının sərhəddən keçməsinə köməklik göstərmək xahişi ilə Türkmənistana müraciət edib. Qeyd olunur ki, Türkmənistanın keçid məntəqələri gecə-gündüz işləyir.

“Türkmən dövləti xarici vətəndaşların ölkənin quru dəhlizlərindən, eləcə də Aşqabad Beynəlxalq Hava Limanından istifadə etməklə fasiləsiz keçidi və vətənə qayıtması üçün lazımi tədbirlər görür”, - XİN-dən bildirilib.