Ermənistanda hakimiyyəti ələ keçirməyə cəhddə şübhəli bilinən 14 nəfər saxlanılıb.
Operativ Media xəbər verir ki, bu barədə Ermənistan İstintaq Komitəsinin mətbuat xidməti məlumat yayıb.
Ermənistan İstintaq Komitəsinin məlumatına görə, 2024-cü ildə baş nazir Nikol Paşinyanın istefasını tələb edən etiraz aksiyalarına rəhbərlik edən arxiyepiskop Baqrat Qalstanyanın rəhbərlik etdiyi “Müqəddəs Mübarizə” hərəkatı terror aktları törətmək və hakimiyyəti ələ keçirmək cəhdi ilə şübhəli bilinir.
“Müstəntiqin vəsatəti əsasında nəzarət edən prokuror 16 nəfər barəsində cinayət işinin başlanması barədə qərar verib. Hazırda müstəntiqin göstərişi ilə 14 nəfər saxlanılıb”, - məlumatda deyilir.
İstintaq Komitəsi iddia edir ki, ölkədə 80-dən çox axtarış aparılıb, nəticədə odlu silahlar, fəaliyyət planları, metal əşyalar, fişənglər, tüstü bombaları, hərbi geyimlər, radio rabitə vasitələri və pilotsuz uçuş aparatları aşkar edilib.
