Ukrayna Xarici İşlər Nazirliyinin yeni strukturunda “Qeyri-dost ölkələrlə iş üzrə idarə” adlı bölmə yaradılacaq.
Operativ Media xəbər verir ki, bu barədə nazirliyin rəhbəri Andrey Sibiga məlumat verib.
Onun sözlərinə görə, o, iyulun 7-dən etibarən Ukrayna XİN-də yeni strukturun fəaliyyətə başlamasını nəzərdə tutan əmr imzalayıb.
“Artıq bizdə yeni, ayrılmış idarələr olacaq. Məsələn, Qeyri-dost ölkələrlə iş üzrə idarə. Bu bölməyə yalnız Rusiya deyil, həmçinin onun müttəfiqləri — Şimali Koreya və Belarus kimi ölkələr də daxil olacaq. Məsələ ikitərəfli münasibətlərdə deyil, təhlükələrin qarşısının alınmasındadır”, – deyə Sibiga özünün "Facebook" səhifəsində yazıb.
Yeni idarənin fəaliyyətinə nəzarət birinci vitse-nazir tərəfindən həyata keçiriləcək.
