Texasda daşqınlar nəticəsində 109 nəfər ölüb, 160-dan çox insan itkin düşüb

ABŞ-nin Texas ştatında baş vermiş sel fəlakətində ölənlərin sayı 109-a yüksəlib, 160-dan çox itkin düşmüş şəxsin axtarış-xilasetmə işləri isə davam etdirilir.

Operativ Media xəbər verir ki, Texas ştatının qubernatoru Qreq Abbot güclü yağışlar nəticəsində baş vermiş sel fəlakəti ilə bağlı mətbuat konfransı keçirib.

Abbotun sözlərinə görə, fəlakət nəticəsində ştat üzrə həlak olanların sayı 109 nəfərə çatıb, təkcə Kerr dairəsində 161 nəfər itkin düşmüş hesab olunur. Ştat üzrə ümumi itkin düşənlərin sayı barədə məlumat verilməyib.

Qubernator bildirib ki, bütün itkin düşən şəxslər tapılanadək axtarış işləri davam etdiriləcək.

ABŞ-nin cənubunda yerləşən Texas ştatında 4 iyulda qəfil başlayan güclü yağışlar səbəbindən Kerr dairəsindən keçən Quadelupe çayı daşaraq selə səbəb olub.

ABŞ Prezidenti Donald Tramp sel fəlakəti ilə əlaqədar Kerr dairəsini fəlakət zonası elan edib.

Ştatın Respublikaçı yerli rəsmiləri Prezident Trampın qənaət siyasəti çərçivəsində büdcəsi azaldılmış Milli Hava Proqnozu Xidmətini fəlakətdən əvvəl kifayət qədər xəbərdarlıq etməməkdə və düzgün proqnoz verməməkdə günahlandırıblar.