Latviya dövlət qulluqçularının Rusiya və Belarusa səfərlərini məhdudlaşdırır

Latviyanın Nazirlər Kabineti milli təhlükəsizlik baxımından əhəmiyyət kəsb edən şəxslərin Rusiya və Belarusa səfərinə məhdudiyyətlər nəzərdə tutan proseduru təsdiqləyib.

Operativ Media xəbər verir ki, bu barədə "Delfi" portalı məlumat yayıb.

Sənəd 2024-cü il iyulun 11-dən etibarən qüvvəyə minəcək.

Qeyd olunur ki, məhdudiyyətlər hərbi qulluqçulara, nazirlik və idarələrin əməkdaşlarına, Seym (parlament) üzvlərinə, hakimlərə, diplomatlara, eləcə də mühüm infrastruktur obyektlərində çalışan şəxslərə şamil ediləcək. Lakin bu qadağa şəxsin xidməti vəzifələrinin icrası və ya humanitar səbəblərə görə ölkəni müvəqqəti tərk etməsi zərurəti yarandıqda, xüsusi icazə əsasında tətbiq edilməyəcək.

Latviya Dövlət Təhlükəsizlik Xidmətinin məlumatına görə, hakimiyyətin Rusiya Federasiyasına səfər etməmək barədə dəfələrlə etdiyi çağırışlara baxmayaraq, 2024-cü ildə Latviya sakinlərinin Rusiyaya səfərlərinin sayı 2023-cü illə müqayisədə iki dəfə artıb. Belə ki, 2024-cü ildə hər ay orta hesabla 2000 nəfər, 2023-cü ildə isə ayda təxminən 1000 nəfər Rusiyaya səfər edib.