"Qarabağ"ın müdafiəçisi: Çempionlar Liqasından başımız dik şəkildə ayrıldıq

"Bu gün Çempionlar Liqası ilə vidalaşdıq, amma başımız dik, qəlbimiz dolu şəkildə ayrıldıq".

Operativ Media xəbər verir ki, bu sözləri "Qarabağ"ın futbolçusu Kevin Medina sosial şəbəkə hesabında yazıb.

Kolumbiyalı müdafiəçi dünyanın ən böyük klub turnirində "Qarabağ"ı və Azərbaycanı təmsil etdiyi üçün qürur duyduğunu bildirib:

"Sonadək mübarizə apardıq, çətinlikləri dəf etdik, unudulmaz gecələr yaşadıq və göstərdik ki, zəhmət və birliklə ən yüksək səviyyədə rəqabət aparmağa qadirik. Hər oyun bir döyüş idi, meydandakı hər anı ehtiras və məsuliyyətlə yaşadıq. Yolumuz burada bitsə də, yerinə yetirilmiş missiya hissi və meydanda hər şeyimizi qoyduğumuza dair əminlik qalır"

O, komanda yoldaşlarına, məşqçilər heyətinə, kluba və ən əsası, onları heç vaxt tək qoymayan və daim inanan azarkeşlərə təşəkkür edib.

"Siz hər stadionda, hər dəqiqədə bizim gücümüz oldunuz. Daha güclü ayrılırıq. Daha təcrübəli ayrılırıq. Və daha yaxşı qayıdacağıq. Keçdiyimiz yol ilə qürur duyuram. Bu son deyil — yolumuzda daha bir addımdır".

Qeyd edək ki, "Qarabağ" UEFA Çempionlar Liqasında pley-off mərhələsinədək irəliləyə bilib. Komanda bu raundda İngiltərənin "Nyukasl" klubuna uduzub.