Xəbər verdiyimiz kimi, Moldovanın aşağıbüdcəli aviaşirkəti "FLYONE" Kişinyov ilə Bakı arasında birbaşa müntəzəm uçuşların icrasına başlayıb

Operativ Media-nın xəbərinə görə, aviaşirkət həmçinin Bakıdan Avropanın və digər regionların ən populyar şəhərlərinə olduqca əlverişli tranzit imkanları təqdim edir. Şirkətin Moldova paytaxtındakı Kişinyov (RMO) qovşağı vasitəsilə sərnişinlər Bakı Heydər Əliyev Beynəlxalq Aeroportundan (GYD) tək bir keçidlə geniş bir coğrafiyaya rahatlıqla səyahət edə bilərlər.

Bu uçuşlar çərçivəsində Bakıdan birbaşa olaraq yalnız Moldovanın paytaxtı Kişinyova getmək mümkündür. Lakin sərnişinlər Kişinyov hava limanından tranzit keçid etməklə siyahıda yer alan 20-dən çox Avropa və Asiya şəhərinə asanlıqla bilet əldə edə bilərlər.

Bakıdan Kişinyova bilet qiymətləri 99 avrodan başlayır, əks istiqamətdə isə biletləri 109 avrodan başlayan qiymətlərlə əldə etmək mümkündür.

Səyahətçilər üçün iyul və avqust aylarında müxtəlif istiqamətlər üzrə təqdim olunan birtərəfli biletlərin minimal qiymətləri də olduqca cəlbedicidir. Belə ki, bu mövsümdə Londonun müxtəlif hava limanlarına (Luton və Stansted daxil olmaqla) uçuşlar 120 avrodan, Berlinə 140 avrodan, Brüsselə isə 145 avrodan başlayır.

İtaliyanın tarixi Bolonya şəhərinə biletləri 146 avrodan, İrlandiyanın paytaxtı Dublinə 156 avrodan, Fransanın paytaxtı Parisə (Şarl de Qoll) isə 158 avrodan başlayan qiymətlərlə tapmaq mümkündür. 

Yay aylarının ən sevilən dənizkənarı şəhərlərindən olan Barselonaya uçuşların başlanğıc qiyməti 165 avro, İsveçrənin Cenevrə şəhərinə 176 avro, Amsterdama isə 186 avro təşkil edir.

Qeyd edək ki, bu səfərləri planlaşdırarkən sərnişinlərin getmək istədikləri ölkələrin viza tələblərinə, xüsusilə Şengen zonası və ya Böyük Britaniya viza qaydalarına mütləq diqqət yetirmələri lazımdır. Bundan əlavə, rahat səyahət üçün Kişinyov hava limanındakı gözləmə (tranzit) müddətlərini əvvəlcədən yoxlamaq tövsiyə olunur. Bütün bu istiqamətlər üzrə biletləri aviaşirkətin rəsmi saytı və ya mobil tətbiqi vasitəsilə əldə edə bilərsiniz.