Rəşad Sadıqov: "Turan Tovuz"da bizə qarşı aqressiya rəhbərdən gəlir

​"Zirə" Azərbaycan Premyer Liqasının VI turunda səfərdə "Turan Tovuz"a 0:1 hesabı ilə məğlub olub.  

Operativ Media xəbər verir ki, qəsəbə təmsilçisinin baş məşqçisi Rəşad Sadıqov oyundan sonra mətbuat konfransında açıqlamalar verib.

​Tovuzda oynamağın çətinliyini vurğulayan mütəxəssis komandasının əzmkar mübarizə apardığını bildirib: "Futbolçularıma əzmkar oyuna görə təşəkkür edirəm. Bu gün komandamı məğlub görmürəm".

​Matçın sonundakı gərginliyə və hakim qərarlarına toxunan "qartallar"ın çalışdırıcısı son vaxtlar hakimlərə qarşı təzyiqlərin artıqığını qeyd edib: "Son illər dəb halını alıb ki, legioner məşqçilər hakimlərin üzərində təzyiq yaradırlar və hakimlər də bu təzyiqə düşürlər. Son 6 ildə çempionatda ən çox səhvlər "Zirə"yə qarşı olub. İlk dəqiqələrdən hiss edirdim ki, buradan xalla ayrılmaq çətin olacaq. Əminəm ki, autu biz atsaydıq, oyun bitəcəkdi".

​Komandasının hücumda passiv görünməsinin səbəblərindən danışan Rəşad Sadıqov rəqibin oyun üslubuna diqqət çəkib: "Turan Tovuz"a qarşı hücum futbolu oynamaq çətindir. Rəqib çoxsaylı uzun ötürmələrdən istifadə edir. Ona görə də bizim topla oynamaq imkanımız olmurdu. 60-cı dəqiqədən sonra oyuna nəzarət bizdə idi".

​Tərəflər arasında olan aqressiyaya da münasibət bildirən baş məşqçi bunun avrokuboklarla bağlı olmadığını, məsələnin kökünün daha əvvəlki matçlara və rəhbərliyə gedib çıxdığını deyib: "Bu aqressiya "Azersun Arena"da "Turan Tovuz"a məğlub olduğumuz oyundan sonra başlayıb. Bilmirəm "Turan Tovuz"da bizə qarşı aqressiya kimdən gəlir. Əslində bilirəm, rəhbərlikdən gəlir, amma hansı rəhbərdən olduğunu bilmirəm".