Rusiya Milli Qvardiyasına könüllülərin cəlb edilməsinə icazə verilə bilər

Dövlət Dumasının bir qrup deputatı və senatoru Milli Qvardiya Qoşunlarının Federal Xidmətinə (Rosqvardiya) könüllüləri daxil etməyə imkan verən qanun layihələri paketi hazırlayıb. 

"Operativ Media" xəbər verir ki, bu barədə Dövlət Dumasının İnformasiya Siyasəti Komitəsinin rəhbəri Aleksandr Xinşteyn məlumat verib.

Onun sözlərinə görə, təkliflər sentyabrın 22-də baxılmaq üçün Dumaya təqdim oluna bilər.

Xinşteynin sözlərinə görə, yeniliklər onu deməyə əsas verir ki, dövlət başçısının qərarı ilə Rusiya Qvardiyası tərəfindən könüllü birləşmələr yaradıla bilər. Onların səfərbərlik, hərbi vəziyyət, silahlı münaqişə şəraitində müdafiə tapşırıqlarının yerinə yetirilməsinə cəlb edilməsi təklif olunur.

Xinşteyn qeyd edib ki, yeni normaların qəbulundan sonra Müdafiə Nazirliyinin könüllüləri üçün qüvvədə olan bütün hüquqi və sosial təminatlar Rusiya Qvardiyasının könüllülərinə şamil ediləcək. Onun sözlərinə görə, təşəbbüslər Rusiya Qvardiyasının xüsusi hərbi əməliyyatda fəal iştirakı və Müdafiə Nazirliyinin funksionallığına oxşar tapşırıqların icrası ilə bağlıdır.