Hindistan HDQ dəniz quldurlarının hücumuna məruz qalan İran gəmisini xilas etmək üçün əməliyyat keçirib

Hindistan Hərbi Dəniz Qüvvələrinin gəmiləri Somali sahillərində dəniz quldurları tərəfindən ələ keçirilən İran balıqçı gəmisini azad etmək üçün əməliyyat keçirib.

"Operativ Media" xəbər verir ki, bu barədə Hərbi Dəniz Qüvvələrinin mətbuat xidməti məlumat yayıb.

Məlumata görə, Hərbi Dəniz Qüvvələri cümə axşamı axşam saatlarında İranın Əl Kamar 786 balıqçı gəmisinə piratların hücumu barədə məlumat alıb. Hadisə Hind okeanında Quardafui burnundan (Somalinin şimal-şərq ucu) 100 km məsafədə yerləşən Sokotra adasından təxminən 170 km aralıda baş verib.

"Hindistan Hərbi Dəniz Qüvvələrinin dəniz təhlükəsizliyi missiyası ilə məşğul olan iki gəmisi qaçırılan gəminin qarşısını almaq üçün göndərilib və gəmiyə doqquz silahlı quldurun daxil olduğu bildirilir. Gəmi martın 29-da ələ keçirilib. Hazırda Hindistan Hərbi Dəniz Qüvvələrinin gəmini xilasetmə əməliyyatı davam edir", - mətbuat xidməti bildirib.