Almaniyanın təhsil naziri universitetləri Çinlə əməkdaşlığı nəzərdən keçirməyə çağırıb

Almaniyada üç nəfərin ÇXR kəşfiyyat xidmətləri ilə əlaqəsi olduğu iddiasına görə saxlanıldığı xəbərləri fonunda alman universitetləri Çinlə əməkdaşlıq layihələrini yenidən nəzərdən keçirməlidir.

"Operativ Media" xəbər verir ki, bunu Almaniyanın Təhsil və Araşdırma naziri Bettina Stark-Watzinger deyib.

"Çin getdikcə daha çox sistemli rəqibə çevrilir, xüsusən də elm və tədqiqat sahəsində. Üç almanın casusluqda şübhəli bilinərək saxlanılması bir daha açıq şəkildə göstərir ki, biz Çinlə münasibətlərimizdə sadəlövh ola bilmərik. Xüsusilə elm sahəsində və universitetlər vasitəsilə əməkdaşlığın riskləri və faydaları ilə tanış olmaq lazımdır", - Stark-Watzinger qeyd edib.

Onun sözlərinə görə, bu, mövcud münasibətlərə yenidən baxmağı vacib edir.

Aprelin 22-də Almaniya Baş Prokurorluğu Çin kəşfiyyat xidmətləri ilə əlaqədə olduqları iddia edilən üç nəfərin Almaniyada saxlandığını elan edib. İttiham tərəfi hesab edir ki, şübhəlilər 2022-ci ilin iyun ayına qədər Çin kəşfiyyatı ilə əməkdaşlıq ediblər və həmçinin xarici ticarət qanununu pozublar.