Türkiyə Azərbaycan və Ermənistanın delimitasiya ilə bağlı addımlarını alqışlayıb

Türkiyə Bakı ilə İrəvan arasında münasibətlərdə müsbət irəliləyişləri alqışlayır. 

"Operativ Media" xəbər verir ki, bunu Türkiyənin hakim Ədalət və İnkişaf Partiyasının rəsmi nümayəndəsi Ömər Çelik Azərbaycanla Ermənistan arasında sərhədin delimitasiyası ilə bağlı razılığın əldə olunmasını şərh edərkən bildirib.

"Biz Azərbaycanla bağlı məsələləri yaxından izləyirik, aprelin 19-da Azərbaycan və Ermənistanın sərhəd məsələləri ilə məşğul olan nümayəndə heyətləri yenidən görüşüb, rəmzi olaraq, bu mesajı dəyərli və müsbət hesab edirik. Bu, həm də Azərbaycana qarşı təcavüzdən imtina etməkdir", - deyə Çelik bildirib. 

Bundan əvvəl Azərbaycan-Ermənistan demarkasiya komissiyasının əldə etdiyi razılaşmalar Türkiyə Xarici İşlər Nazirliyi tərəfindən də müsbət qarşılanıb. Nazirlik bu razılaşmaları Azərbaycan və Ermənistan arasında sülh müqaviləsinin imzalanması istiqamətində mühüm addım adlandırıb.