Bolqarıstan ABŞ ilə F-16-ların tədarükü ilə bağlı müqaviləyə dəyişiklik edib

Bolqarıstan Xalq Məclisinin deputatları iyunun 9-da keçirilən növbədənkənar parlament seçkiləri öncəsi yekun iclasında ABŞ ilə ilk səkkiz ədəd F-16-nın tədarükü və dəstəyinə dair beynəlxalq müqaviləyə əlavələri ikinci, yekun oxunuşda ratifikasiya ediblər.

"Operativ Media" xəbər verir ki, əlavələrdə əsas məsələ 2025-ci ilin birinci rübündə başlayacaq və ilin sonuna qədər tamamlanacaq qırıcıların tədarükü üçün yenilənmiş cədvəldir. Müqavilə qiymətində heç bir dəyişiklik yoxdur.

F-16-ların vaxtında çatdırılması Bolqarıstan Hərbi Hava Qüvvələri üçün mühüm əhəmiyyət kəsb edir, çünki hazırda xidmətdə olan MiQ-29 təyyarələrinin istismar müddəti demək olar ki, tükənib. Bolqarıstanın 2019-cu ildə 1,3 milyard dollara aldığı ilk Amerika F-16-ları 2025-ci ildən təhvil verilə bilər və pilot hazırlığı nəzərə alınmaqla, 2027-ci ildən tez olmayaraq döyüşə hazır olacaq.