Brazilyada sel nəticəsində 10 nəfər ölüb, 21 nəfər itkin düşüb

Brazilyanın cənubundakı Rio Qrande-du-Sul əyalətində bir müddətdir davam edən yağışlar daşqınlara və insan tələfatına səbəb olub.

"Operativ Media" xəbər verir ki, Mülki Müdafiədən verilən açıqlamada, daşqınlarda indiyədək 10 nəfərin həyatını itirdiyi, itkin düşən 21 nəfərin axtarış-xilasetmə işlərinin davam etdiyi bildirilib.

Açıqlamada 1400 nəfərin evləri su basması səbəbindən yaşayış yerini tərk etmək məcburiyyətində qaldığı, bölgəyə gücləndirmə dəstələrinin göndərildiyi qeyd olunub.

Braziliya prezidenti Luiz İnasio Lula da Silvanın tapşırığına əsasən daşqından zərər çəkmiş rayonlara humanitar yardım ləvazimatları göndərilib.

Əyalət qubernatoru Eduardo Leite sosial media hesabından verdiyi açıqlamada bölgədə leysan yağışların davam edəcəyini bildirib və vətəndaşlardan diqqətli olmalarını istəyib.

Güclü yağışlar nəticəsində körpülərin dağıldığı, evlərində qapalı qalan insanların damlarda kömək gözlədiyi görülüb.