Duzlu balıq alarkən nələrə diqqət etmək lazımdır?

“Yayda duzlu balıq, təzə balıqdan çox satılır. Amma saxlama şəraitinə əməl edilməməsi ölümə səbəb ola bilər”.

Bunu “Operativ Media”ya açıqlamasında balıqçılıq üzrə mütəxəssis İlkin Novruzov deyib.

İlkin Novruzov deyir ki, duzlu balığı qapalı və saxlanma şəraiti münasib olan mağazalardan almaq lazımdır. Açıq havada, yol kənarında satılan balıqların riski çoxdur:

"Yay mövsümünə keçdiyimizə görə duzlu balıqları yeni-yeni alıb yemək lazımdır. Parlaqlığına fıkir vermək lazımdı, çox yumşaq olmalı deyil. Duzlu balığın  öz dadı və qoxusu var. Bir də hisə verilmiş balıqları alanda əmin olmasanız, onun istehsal tarixi və məhsul haqqında məlumatı soruşub ala bilərsiniz. Balıqlar soyuq şəraitdə saxlanmalıdır. Açıqda, taxtanın üstündə, günün altında, piştaxtalarda, plyonkaların üstündə qətiyyən saxlamaq olmaz. Aldığımız zaman balığın ətinin bərkliyinə diqqət etməliyik”.

İlkin Novruzovun sözlərinə görə, bazarlarda demək olar ki, satışda olan hisə verilmiş balıqların hər birinin mənşə sertifikatı var. Sadəcə olaraq əksər satıcı saxlanma şəraitinə əməl etmir:

“Əsas burda hisə verilmə müddətində qaydalara əməl etməkdir. Çünki, hisə verilmə müddətində balıq nə qurumalıdır, nə də çiy olmalıdır. Əvvəllər kim haradan gəldi alırdı. İndi isə alıb-satmaq üçün mütləq sertifikat tələb olunur. İxtisaslaşmış sexlərin isə sertfikatları var. Amma satan adam alır gətirir atır kardon kağızın üstünə. Nə temperatur gözlənir, nə saxlanma şəraiti. Bəzi satıcılar isə bu balıqları dondurucuda saxlayır. Əslində o da düzgün deyil”.

Qeyd edək ki, balıqların qiyməti isə növünə və ölçüsünə görə dəyişir. Daha çox alınan xəşəm, çapaq, kütüm və sazan balıqlarıdır. Xəşəm 7-10 manat arası, kütüm və sazan isə 11-15 manat arası satılır. Ən baha balıq isə Nərə balığıdır. Hisə verilmiş nərə balığının kilosu 100 manatadır.