İranda güclü qar yağması və soyuqlar səbəbindən artan enerji və qaz istehlakına qənaət etmək üçün bəzi əyalətlərdə məktəblər, eləcə də dövlət qurumları və idarələri bağlanıb.

"Operativ Media" xəbər verir ki, İranın rəsmi agentliyi İRNA-nın məlumatına görə, Elborz qubernatorunun müavini Kaveh Hedadipur bildirib ki, bu gün onun əyalətindəki bütün məktəblər, idarələr, müəssisə və təşkilatlar və banklar enerji və qaz istehlakını azaltmaq üçün bağlanıb.

Hedadipur qeyd edib ki, lisey və universitet kursu imtahanları nəzərdə tutulan tarixdə keçiriləcək.

Cümə axşamı günü bütün bankların bağlanacağını bildirən Hedadipur, bütün qurum, təşkilat və ofislərin şənbə gününə qədər istilik sistemlərini söndürməli olduğunu bildirib.