Nicat Süleymanov: "Son oyunlarda göstərdiyimiz performans bizə gələcək üçün daha yaxşı nəticələr vəd edir"

"Operativ Media" "Kəpəz" klubunun futbolçusu Nicat Süleymanov ilə müsahibəni təqdim edir:

-Komandanın ilk dövrədəki çıxışını necə qiymətləndirirsiniz?

-Çempionatın əvvəlində komandamızın uyğunlaşma prosesi gözlədiyimiz qədər sürətli olmadı. Biz bunu turlar keçdikcə müşahidə etdik və həqiqətən də komandamız hər oyunda daha əzmkar, daha mübariz oyunu ilə əvvəlki turlardan fərqlənməyi bacardı. Hazırda son oyunlarda göstərdiyimiz performans bizə gələcək üçün daha yaxşı nəticələr vəd edir və bunun üçün bütün komanda əlindən gələni ən yaxşı şəkildə etməyə çalışır.

-İlk dövrədə baş məşqçi sizə əksər oyunlarda şans verdi. Ümumi olaraq öz performansınızdan razısınızmı?

-Futbolçuda həm eniş, həm də yüksəliş dövrləri olur. Mən deyə bilmərəm ki, öz oyunumdan razıyam ya yox, bunu məşqçilər heyəti qiymətləndirir. Amma hansı oyuna çıxmışamsa, komandam üçün hər zaman əlimdən gələni ən yaxşı şəkildə etməyə çalışmışam.

- "Kəpəz"in son pillələrdə olmasının səbəbini nədə görürsünüz?

-Səbəbi nədəsə və ya kimdəsə axtarmaq düzgün deyil. Futbol kollektiv idman növüdür və əgər işlər düzgün getmirsə, bunun günahını kiminsə və ya nəyinsə üstünə atmazdım. Əlimizdən gələni edəcəyik ki, bu qara zolaqdan çıxa bilək, "Kəpəz" azarkeşlərinin rəğbətini qazanaq və komandamızı daha yaxşı yerlərdə görə bilək.

- Azarkeşləriniz komandanızı zaman-zaman tənqid edirlər. Buna münasibətiniz necədir?

-Nəticə ürəkaçan olmadıqda, belə situasiyalara və tənqidlərə bütün komanda olaraq hazır olmaq lazımdır. Mən də futbol azarkeşi olsaydım və komandam zəif oyun göstərsə, yəqin ki, mən də etirazımı bildirərdim. Bu, normal bir haldır. Etiraz edənlər əslində bizi sevənlərdir.

-Qış transfer pəncərəsində "Kəpəz"dən ayrılmaq kimi planınız var?

-Belə bir planım yoxdur. Burada özümü xoşbəxt hiss edirəm. Bəzən ilk 11-likdə oluram, bəzən isə oyuna sonradan daxil oluram. Hər iki halda da özümü ən yaxşı tərəfdən göstərməyə və "Kəpəz" ailəsi, azarkeşləri üçün qələbələr qazanmağa çalışıram. "Kəpəz" mənim üçün doğmadır. Artıq 3-cü ildir ki, "Kəpəz" komandasının uğurları üçün çalışıram.