ABŞ Kərkük-Ceyhan neft kəmərinin tezliklə işə salınmasına tərəfdardır

ABŞ dövlət katibi Marko Rubio və İraqın baş naziri Məhəmməd əl-Sudani İraq və Türkiyə arasında neft kəmərinin yenidən işə salınmasının vacibliyini müzakirə ediblər.

Operativ Media TASS-a istinadən xəbər verir ki, bu barədə ABŞ Dövlət Departamentinin məlumatında deyilir.

“Onlar İraqın enerji müstəqilliyinə nail olmasının, İraq-Türkiyə boru kəmərinin tezliklə yenidən işə salınmasının və İraqda fəaliyyət göstərən ABŞ şirkətlərinin müqavilə şərtlərinə əməl etməsinin vacibliyi ilə bağlı razılığa gəliblər”, - məlumatda bildirilib.

Bundan əvvəl Bağdad İraq Kürdüstanında hasil edilən neftin Kərkük-Ceyhan neft kəməri ilə Türkiyəyə ixracını bərpa etməyə hazır olduğunu bəyan edib.

Kərkük-Ceyhan boru kəməri ilə neft nəqli 2023-cü ilin martında Bağdadın beynəlxalq məhkəmədə İraq Kürdüstanı muxtar bölgəsindən neft ixracı ilə bağlı Türkiyəyə qarşı 2014-cü ildən davam edən prosesi qazanmasından sonra dayandırılıb. Bağdadın əsas iddiası Türkiyənin BOTAŞ neft-qaz şirkətinin İraq Kürdüstanından hasil edilən nefti İraq hökumətinin rəsmi icazəsi və razılığı olmadan dünya bazarına çıxarması ilə bağlı olub.