İran parlamenti fars olmayanların ana dilində ədəbiyyat fənninin məktəblərdə tədrisinə qarşı çıxıb

İran parlamenti fars olmayan etnik qrupların ana dilində ədəbiyyat fənninin məktəblərdə tədrisinə dair plana qarşı çıxış edib.

Operativ Media  xəbər verir ki, məlumatı İSNA yayıb.

Bildirilib ki, fevralın 26-da parlamentin açıq iclasında İran Konstitusiyasının 15-ci maddəsinə əsasən, məktəblərdə fars olmayan etnik qrupların ana dilində ədəbiyyat fənninin tədrisi planı müzakirə edilib. Deputatların 104-ü sənədin lehinə, 130-u isə əleyhinə səs verib. Beş deputat bitərəf qalıb.

Bununla da İran konstitusiyasının 15-ci maddəsi pozulub.

Məlumata görə, parlamentin Təhsil və Araşdırma Komissiyasının nümayəndəsi Ehsan Əmirad ölkə məktəblərində etnik və yerli dillərdə ədəbiyyatın tədrisi lahiyəsi ilə bağlı deyib:

“Konstitusiyanın 15-ci maddəsində ölkənin rəsmi dili fars dilidir”. Bütün rəsmi mətnlərimiz, dərsliklərimiz farscaya əsaslanmalıdır. Konstitusiyanın 15-ci maddəsində deyilir ki, məktəblərdə fars dili ilə yanaşı, etnik və yerli dillərdə ədəbiyyatın tədrisi pulsuzdur. Bu o deməkdir ki, bu plan Konstitusiyanın 15-ci maddəsinə tam uyğundur və hətta onun tələblərindən biri də ola bilər”.

Layihəyə əsasən, məktəblərdə ana dilində ədəbiyyat fənninə iki saat həsr olunmalı idi.