Şimali Koreya lideri Kim Çen In raket sınağını yerində müşahidə edib.

"Operativ Media" bu haqda Şimali Koreya Mərkəzi Xəbər Agentliyinə (KCNA) istinadən xəbər verir.

Strateji qanadlı raketlərin fevralın 26-da ölkənin qərbindən buraxıldığı və sınağın “ölkənin təhlükəsizliyini təhdid edən düşmənlərə qarşı nüvə hücumu imkanlarını nümayiş etdirmək” məqsədi ilə həyata keçirildiyi bildirilib.

Kim hərbçiləri “nüvə silahından istifadə etməyə hazır olmağa” çağırıb.

Raket sınaqları ilə tez-tez gündəmə gələn Şimali Koreya dənizdən quruya strateji qanadlı raketlərini sonuncu dəfə yanvarın 26-da sınaqdan keçirib.

Şimali Koreya yanvarın 7-də də yeni tip orta mənzilli hipersəs ballistik raketi sınaqdan keçirdiyini açıqlayıb.